لا أستطيع أن أرد على ما في الصورة سوى بهذه الكلمات:
 
علشان تبقي باشا تاني ! يا باشا لازم تكون كبير
مش تسيب اللى بيأمرك بالغلط و تتشطر على اللى في التحرير
 فاكر لما استخبيتوا يوم 28 و قولنا أكيد اللى بعدك شيء خطير
 و استنجدنا بيك من البلطجية و كمان اللى خرجوا من السجون كتير
و محدش سمع ندانا و قولتوا مأجورين و بياكلوا كنتاكي و فطير
 عمرك ما هتاخد مكانك غير لما نديك التأشير
 عمر إحترامنا ليك ما كان بالقوة و إنما نابع من الضمير
 لكن تسيب الحرامية و تموت اللي في التحرير؟
 و تصيب عيونهم و تخلي المبصر فيهم ضرير؟
و شاطر يا باشا جت في عينه و منتظر تصفق لك الجماهير !!!
 و ترمي عليهم الغاز اللى موت الطفل و الكهل الكبير؟
 علطول هتلاقينا ضدك من غير تفكير
 لأنك مش بتحميني ساعتها و هاتخليني أحصل إسلام بكير
من غير ما أطول و أقولك اسامي الشهدا و اللى اتصابوا على إيد سعتك و العسكري و الغفير
لو كنت لحظة كلفت خاطرك و بذلت جهد في التفكير
 كنت هاتشوفهم ولادك و أخواتك و تعرف إن غلطك كبير
ها أروح فين أنا من اللي ضحى بنور عينه و لكن بصيرته مصباح منير
و هاتروح فين أنت يوم السؤال لما يتساوى الغني و الفقير
و يسألك رب العباد عن ذنبك اللى عملته بدون تقصير
عاوز ترجع مكانك موافق ، بس لازم يكون عندك ضمير
 و تفرق في المعاملة ما بين شاب بيبني و مجرم أجير
ــــــــــــــــــــــــــــــــــــــــــــــــــــــــــــــــ
تحديث : تمت إضافة بعض الأبيات ...
...تابع القراءة